HOnured be this blissed holy festë day In worshippe of the sweet[ë] welle of liffe,
With alle the ioyes & mirthë þat we may,for Crist, the kirke hath chosë to his wiffe;And fynally abated is þat striffe, Þat him betwyn, & man, hath longë be;Honured be this blessed Trinite!
Owt of this welle, so noble licoure ran, So faire, so fressh, so lusty, hony-sweet,That sith this first day þat the world be-gan,With suche a wellë might[ë] no man mete.Alle heuynesse & malice is for-gete As toward man; excused clene is hee;honured be the blissed Trinite!
This day, so lowe he wold him self incline, The thrid[dë] festë with his highe personeTo honure, turnyng watir in-to wynne.This day was Ihesu baptised of seint Iohn;The fadir-is voice was herd owt of his trone: "This is my loued sone, þat liketh me."honured be the souereyn Trinite!
And þat he schuld haue recorde Autentyk, The thrid[dë] persone, on oure lord a-light,The holy gost, vn-to a dowe I-lyk,That pleyn[ë]ly was seyn of eueri wight. Thus blissed hath he watir, god al-myght, In honure of this [highe] solemnite.Honured be the blissed Trinite!
