HOnured be thu, blisfull lord a-bove, That vowchidsaffë this iourny to take,Man to become, only for man-is love,And deth to suffre, for my synnës sake;So hast thu vs owt of the bondë schake, Of Sathanas, þat held us longe in peyne:Honured be thu, Ihesu souereyne!
Full evele I dede, whan I the appil took; I wend to haue had therbi prosperite;It satte so ny my sidës, þat thei ooke;To greet myschief I fill from hey degre,And alle my issue, for be-cause of me; Now hast þou, lord, restored all a-geyn:Honured be thu, Ihesu souereyne!
So richëly þou hast refresshèd vs, And vs counfórted with thi feste riall;So swet a fruyt, & so delicïows,So faire it is, and so celestiall,That oure disease now is forgotten all, This fruyt hath so visíted eueri veyne:Honured be thu, Ihesu souereyne!
This may be called weel the fruyt of liff. The fruyt of deth, was wherof I asaide;That, be thi Iugëment diffinitiffe,ffoure thowsande yere I was ful ille araide,Til þat this fruyt, þat born was of a maide, haddë reformed: therefor lat vs seyn,Honured be thu, Ihesu souereyn!
